HAPET XHAMIA “HFZ. XHAVIT EF. IBRAHIMI” NË STUDENIÇAN

Sot, më 16 dhjetor 2021, në prezencë të Kryetarit të Bashkësisë Fetare Islame Reisul Ulema H. Hfz. Shaqir ef. Fetai u bë hapja e xhamisë “Hfz. Xhavit ef. Ibrahimi” në fshatin Studeniçan të Shkupit.
Nën udhëheqjen e Myftiut Dr. Qenan ef. Ismaili dhe në koordinim me këshillin inicues të xhamisë , u lëshua në shërbim xhamia “Hfz. Xhavit ef. Ibrahimi” në Studeniçan, e cila mban emrin e rahmetli hoxhës së mirënjohur të kësaj ane Hafiz Xhavit ef. Ibrahimit.

Këtë manifestim me prezencën e tyre e nderuan edhe Kryetari i Komunës së Studeniçanit z. Azem Sadiku, Myftiu i Tetovës prof. Dr. Qani ef. Nesimi, Myftiu i Gostivarit H. Sabahudin ef. Zendeli, Myftiu i Manastirit Mr. Amit ef. Rasimi, Myftiu i Prilepit H. Shefket ef. Imeri, Myftiu i Ohrit Mr. Samet ef. Ajdari, Myftiu i Strugës Mr. Salim ef. Sulejmani, Kryetari i Kuvendit të BFI Fejsall ef. Kadriu, Sekretari i Përgjithshëm i BFI H. Irsal ef. Jakupi, drejtorët e sektorëve të Rijasetit të BFI; Hfz. Xhemail ef. Nuhiu, përgjegjës i Institutit tė Hifzit në Shkup “Hfz. Ismail Efendiu”, hoxhallarë, hafëzllarë si dhe mysafirë të ndryshëm nga Karshiaka e më gjerë.

Para se të bëhet duaja e hapjes së kësaj xhamie, u lexuan edhe disa pjesë nga Kurani Famëlartë nga Hfz. Adnan ef. Elmazi. Fjalë përshëndetëse mbajti Kryetari i Komunës së Studeniçanit z. Azem Sadiku, ndërsa të dhënat rreth ecurisë së ndërtimit të xhamisë i prezantoi z. Alaudin Zekiri, Kryetar i Këshillit Iniciues.


Të pranishmit i përshëndeti edhe nikoqiri i këtij organizimi, Myftiu i Shkupit Dr. Qenan ef. Ismaili i cili vlerësoi lartë punën e Këshillit Iniciues dhe falënderoi të gjithë donatorët për kontributin e tyre, deri në përfundimin e xhamisë. Fjalën kryesore e pati Kryetari i BFI, Reisul Ulema H. Hfz. Shaqir ef. Fetai, i cili i uroi banorët e këtij fshati për xhaminë e re dhe u dëshiroi punë të mbarë dhe suksese të reja. Në emër të Bashkësisë Fetare Islame i falënderoi të gjithë kontribuuesit në ndërtimin e kësaj shtëpie të Allahut Fuqiplotë. Më pas, Reisul Ulema në prani të gjithëve, u dorëzoi autorizimet për dy hoxhallarët; Muhamed ef. Sadiku, i diplomuar në Universitetin e famshëm të El Ez’her të Kajros si hatib i xhamisë dhe hfz. Xhelil ef. Shabani – imam dhe mualim i xhamisë. Gjithashtu, u dekoruan me mirënjohje të veçantë gjithë ata që dhanë kontributin e tyre në ndërtimin e xhamisë.

Ashere për nder të këtij solemniteti lexoi hfz. Xhemail ef. Nuhiju, ndërsa duanë e rastit e bëri Myftiu i Strugës Mr. Salim ef. Sulejmani. Myftiu i Tetovës Dr. Qani ef. Nesimi i priu faljes së namazit të ikindisë. Xhamia “Hfz. Xhavit ef. Ibrahimi” radhitet xhamia e katërt e ndërtuar në Studeniçan.

I lutemi Allahut Fuqiplotë që t’i shpërblejë me mirësitë e Tij të pakufishme gjithë ata që kanë kontribuar në ndërtimin e xhamisë e që nga sot dyert e saja të jenë të hapura për besimtarët!